"Тойбосс" өндүрүштү кеңейтип, азык-түлүк коопсуздугун бекемдейт

25-октябрда "Тойбосс" компаниялар тобуна кирген алдыңкы ишканалардын жаңы объекттеринин — Балыкчы шаарындагы "Кыргыз Бройлер" заводу менен Кеминдеги "Агро Куш" канаттуулар комплекстеринин расмий ачылыш аземи болуп өттү.

Иш-чарага Министрлер Кабинетинин төрага орун басары — Суу ресурстары, айыл чарба жана кайра иштетүү өнөр жай министри Бакыт Төрөбаев, Президенттин Ысык-Көл облусундагы ыйгарым укуктуу өкүлү Бакытбек Жетигенов, Ысык-Көл облусунун губернаторунун биринчи орун басары Данияр Арпачиев, Балыкчы шаарынын мэри Баатырбек Жантаев, Мамлекеттик өнүктүрүү банкынын өкүлү Эмил Такырбашев, ошондой эле мамлекеттик түзүмдөрдүн жана бизнес чөйрөсүнүн өкүлдөрү катышты.

Бул долбоор Кыргыз Республикасынын Президентинин демилгеси менен ишке ашырылып жаткан азык-түлүк коопсуздугун камсыздоо боюнча мамлекеттик программанын алкагында жүзөгө ашырылган.

"Бүгүн "Кыргыз Бройлер" ишканасы жылына 21 миллион инкубациялык жумуртка чыгарат. Бул бизге 30 миң тонна тоок этин өндүрүүгө мүмкүндүк берет. Бул өлкө үчүн маанилүү кадам, анткени ал азык-түлүк коопсуздугуна түздөн-түз таасир этет. Биз Кыргызстанда жумуртка өндүрүшү боюнча толук өзүн-өзү камсыздоого жетиштик", — деп белгиледи Бакыт Төрөбаев.

Ошол эле күнү Кемин шаарында "Агро Куш" канаттуулар комплексинин капсуласын салуу аземи болду.

Кеминдеги өндүрүштүк комплекс компаниянын учурдагы өндүрүштүк кубаттуулугун кеңейтүүгө багытталган ири инвестициялык долбоор болуп саналат. Анын курамына жаңы инкубаторий, канаттууларды багуу аянтчалары, комбикорм заводу жана дээрлик даяр продукцияны сактоо кампалары кирет.

Комплекс ишке берилгенден кийин "Тойбосс" компаниялар тобу жылына болжол менен 30 миң тонна тоок этин өндүрөт, бул 20 миллион бройлерге барабар. Ал эми комбикорм өндүрүшүнүн көлөмү жылына 28 миң тоннадан 115 миң тоннага чейин өсөт.