«Тойбосс» компаниялар тобу Эл аралык каржылык корпорация (IFC) менен 10 миллион АКШ долларына чейинки каржылоо боюнча келишим түздү

«Тойбосс» компаниялар тобу Дүйнөлүк банктын мүчөсү болгон Эл аралык каржылык корпорация (IFC) менен сом эквивалентинде 10 миллион долларга чейин каржылоо боюнча расмий келишим түздү.

Инвестиция инкубатор куруу, комбикорм заводуна старт берүү жана өндүрүштүк кластерди модернизациялоо иштерине багытталат. Бул долбоор Кыргызстанда тоок этин өндүрүүнү кеңейтүүгө, импортко болгон көз карандылыкты азайтууга жана фермерлер, кайра иштетүүчүлөр жана жергиликтүү дистрибьюторлор үчүн жаңы мүмкүнчүлүктөрдү түзүүгө багытталган.

Айыл чарба чынжырынын өнүгүүсү

Компаниянын жаңы өнүгүү этабы төмөнкү багыттарды камтыйт:

• Жылына 115 миң тонна өндүрүмдүүлүгү бар комбикорм заводунун курулушу (анын бөлүгү жергиликтүү малчыларга да жеткиликтүү болот);

• Ички инкубаторлорду ишке киргизүү жана инфраструктураны өнүктүрүү;

• 3500дөн ашуун жергиликтүү фермерди камтыган жеткирүү тутумун кеңейтүү;

• Жылына 78 800 тоннадан ашык чийки зат сатып алуу.

Иш орундар жана экономикалык салым

Долбоор аркылуу 655тен ашуун жаңы жумуш орду түзүлөт, негизинен Чүй облусунун Кемин районунда. Компания жыл сайын мамлекеттик бюджетке 100 миллион сомдон ашык салык жана социалдык төлөм төлөөнү пландоодо.

Импорттун ордун жергиликтүү өндүрүш алмаштырат

2024-жылы Кыргызстанга 67 миң тонна тоок эти импорттолгон, негизги камсыздоочулар — Кытай жана Россия. 2027-жылга чейин компания өз өндүрүшүн 12 миң тоннадан 15,5 миң тоннага чейин жогорулатып, ички суроо-талаптын 25%ын жабууну көздөөдө.

Мамлекеттик стратегияларга жана Туруктуу өнүгүү максаттарына шайкештик

Долбоор Кыргыз Республикасынын 2026-жылга чейинки Улуттук өнүгүү программасынын жана 2040-жылга чейинки Туруктуу өнүгүү стратегиясынын алкагына туура келип, төмөнкү Туруктуу өнүгүү максаттарын (ТӨМ) колдойт:

• №1 — Жакырчылыкты жоюу

• №2 — Тамак-аш коопсуздугун камсыз кылуу

• №8 — Экономикалык өсүш

• №12 — Жоопкерчиликтүү керектөө жана өндүрүш

IFC тарабынан колдоо — ишенимдин белгиси

IFC — бул жеке сектор менен иштеген дүйнөдөгү эң ири өнүгүү институту. Аталган уюм колдогон бардык долбоорлор катуу текшерүүдөн өтөт: каржылык ачыктык, туруктуулук жана корпоративдик башкаруу жагынан.

«Биз Эл аралык каржылык корпорацияны ишенимдүү бизнес өнөктөш катары көрөбүз. Биздин кызматташтык өндүрүштү өнүктүрүүгө дагы күчтүү түрткү берет», — деди Мырзабек Орумбаев, «Тойбосс» компаниялар тобунун башкы директору.

Компания IFC менен мурда да ийгиликтүү кызматташкан — эл аралык стандарты боюнча азык-түлүк коопсуздугу тутумун ишке киргизүүдө колдоо көрсөтүлгөн.

Бул жаңы келишим Кыргызстанда ачык-айкын жана жоопкерчиликтүү бизнес эл аралык стандарттарга жооп берип, узак мөөнөттүү инвестиция тартууга жөндөмдүү экенин далилдейт.