Кыргыз тилин колдоого жаңы кадам: «Тойбосс» 50 мектепке 2700 балдар китебин тартуулайт

Кыргызстанда балдардын китепке жеткиликтүүлүгүн кеңейтүүчү маанилүү долбоор ишке ашты

Бүгүн 20-мартта «Тойбосс» компаниясынын колдоосу менен «Тоо балдары» коомдук фондуна китептерди расмий тапшыруу аземи болуп өттү. Бул демилге Кыргызстандын алыскы аймактарындагы 50гө жакын мектепке кыргыз тилиндеги адабиятты жеткирүүгө багытталган.

Кыргыз тилин өнүктүрүү жана жайылтуу – бардык тармактардын өкүлдөрү биргеликте аракеттенүүсүн талап кылган орчундуу маселе. Бул багытта «Тойбосс» компаниясы билим берүү демилгелерин колдоого алып, жаш муундун өз эне тилинде сапаттуу адабиятка жетүүсүнө шарт түзүүгө салым кошуп, бөбөктөр үчүн кыргыз тилиндеги уникалдуу жомоктордун сериясын «Турар» басмасы менен бирге жарыкка чыгарды.

Китептер “Турар” басмасынан жарык көрүп, жаш муундун жомоктор дүйнөсүнө тартылуусуна, окууга болгон кызыгуусун арттырууга да чоң өбөлгө түзөт.

Мамлекеттик тилди өнүктүрүү – ар бир жарандын жоопкерчилиги. Бул сыяктуу демилгелер улуттук тилди сактоо жана жайылтуу үчүн чоң мааниге ээ болуп, бардык тармактардын өкүлдөрүн кыргыз тилин колдоого чакырат.